Publicado 21 abril 2025. Fuente: Libraría Institucional Xunta de Galicia
O Servizo Galego de Saúde (Sergas) acaba de publicar unha guía dirixida ao persoal sanitario de Atención Primaria co obxectivo de mellorar a atención ás persoas trans e fomentar un trato sen discriminación nos centros de saúde.
A guía, dispoñible na web institucional da Xunta de Galicia, recolle recomendacións prácticas para o acompañamento das persoas trans nos itinerarios asistenciais e incide na importancia do uso do nome e os pronomes elixidos, así como na creación de espazos de consulta seguros, confidenciais e libres de prexuízos.
Segundo o documento, “o recoñecemento da identidade de xénero é fundamental para garantir unha atención sanitaria axeitada” e lembra que o trato despectivo, a invisibilización ou a falta de formación específica constitúen barreiras que poden dificultar o acceso ao sistema público de saúde por parte das persoas trans.
Tamén propón accións concretas como a inclusión de indicadores nos sistemas de rexistro que permitan recoller a identidade de xénero respectando a vontade da persoa, o fortalecemento da formación continua en diversidade e a coordinación entre niveis asistenciais para ofrecer unha resposta integral ás necesidades de saúde deste colectivo.