O Goberno galego e a Universidade de Santiago de Compostela crearán a Cátedra institucional “Vida Saudable”, que impulsará a investigación e a mellora do coñecemento na promoción dun estilo de vida saudable. A cátedra encádrase nos obxectivos do Plan de Obesidade Zero da Xunta de Galicia 2022-2030 e será un foro para a execución de actividades docentes, académicas e investigadoras especializadas en hábitos de vida saudable e envellecemento activo.
Sala de prensa Sergas (09/02/2023) Fotografía: Sala de prensa Sergas
O Goberno galego e a Universidade de Santiago de Compostela crearán a Cátedra institucional “Vida Saudable”, que impulsará a investigación e a mellora do coñecemento na promoción dun estilo de vida saudable. A cátedra encádrase nos obxectivos do Plan de Obesidade Zero da Xunta de Galicia 2022-2030 e será un foro para a execución de actividades docentes, académicas e investigadoras especializadas en hábitos de vida saudable e envellecemento activo.
A Xunta investirá 100.000 euros nesta cátedra de nova creación, que terá unha duración de 4 anos e que servirá tamén como instrumento de colaboración entre o persoal investigador, o profesorado da USC e os profesionais sanitarios e non sanitarios vencellados ao sistema sanitario público galego.
O Consello da Xunta abordou na súa reunión de hoxe o proxecto de acordo polo que se autoriza a sinatura do convenio de colaboración entre a USC e a Consellería de Sanidade para a creación desta cátedra institucional.
Máis polo miúdo, o programa de actividades desta nova ensinanza incluirá as seguintes actuacións: creación da rede de investigación e innovación galega en promoción da saúde; desenvolver novas liñas de investigación en hábitos de vida saudables e envellecemento activo ou potenciar as xa existentes; establecer un sistema de avaliación periódica do sobrepeso e a obesidade da poboación galega e dos cambios no comportamento relacionados cos seus factores protectores; realizar cursos, seminarios, conferencias e cantas actividades académicas redunden na difusión, o coñecemento e a práctica dun estilo de vida saudable, así como promover e organizar actividades que contribúan a facilitar a reflexión e o debate co fin de acadar o seu mutuo enriquecemento intelectual e a mellora da súa formación.
Tamén, entre as actividades previstas pola cátedra está a colaboración co profesorado e departamentos da USC en todo aquilo que favoreza a formación integral do alumnado; favorecer a difusión e o coñecemento das investigacións realizadas mediante publicacións e outras accións de comunicación; a creación e mantemento dun fondo bibliográfico e documental sobre as materias específicas da promoción da saúde e as disciplinas con ela relacionadas; facilitar a inserción profesional dos e das estudantes da USC participando, de ser o caso, nas actividades realizadas pola cátedra e fomentar a colaboración entre a USC e o sector profesional no ámbito da promoción da saúde.
O Plan de Obesidade Zero en Galicia 2022-2030 responde ao cumprimento das normativas e estratexias específicas para a prevención da obesidade e o sobrepeso a nivel nacional e europeo. A nova cátedra institucional inclúese como un dos eixes estratéxicos deste plan galego, que pretende reforzar a saúde e a calidade de vida da cidadanía cun modelo de vida saudable. Tras o seu paso polo Consello da Xunta, a Consellería de Sanidade e a Universidade de Santiago de Compostela formalizarán o convenio para a posta en marcha desta nova cátedra, que terá unha vixencia de catro anos e poderá ser renovado por outros catro. A USC será a encargada de constituír a cátedra e designar a persoa que exercerá a súa dirección, quen elaborará, organizará e desenvolverá a programación anual de actividades e proxectos.