Un momento da presentación da Asociación Ourensividad, este xoves pasado no Liceo de Ourense | FONTE: Liceo de Ourense (RRSS)
Ourense, a 21 de abril de 2023. O Salón Noble do Liceo de Ourense acolleu este xoves a presentación de ‘Ourensividad’, unha asociación creada para poñer en valor os alimentos de proximidade, os hábitos saudables e o termalismo. A este evento foi convidada a presidenta do Colexio Oficial de Enfermería de Ourense, Ascensión Pérez Sampayo, quen puido coñecer de primeira man as claves do proxecto, o que aspira a converter Ourense nun ‘referente mundial da lonxevidade’.
‘Ourensividad’ nace coma un punto de encontro formado e impulsado por diferentes profesionais do ámbito sanitario e das ciencias da saúde, así coma por profesores e asociacións que tamén contan cunha amplia traxectoria no eido da saúde. O seu obxectivo é, en palabras do seu presidente, o farmacéutico, dietista e nutricionista, Pablo G. Vivanco, “desenvolver medidas que conduzan a unha lonxevidade activa aproveitando que Ourense é un lugar idóneo para facelo”.
El mesmo foi o encargado de explicar neste evento que o que se pretende é crear “un grande produto turístico establecendo sinerxias cos diferentes colectivos, asociación e concellos da provincia”, así como coa recolla de patróns entre centenarios e a través de estudos xenéticos. Tódalas accións previstas, sobre as que se comezará a traballar en breve, están orientadas a converter Ourense nun “laboratorio de lonxevidade”. Por isto, a meta de Ourensividade é a de contribuír á creación de políticas sociais, enfocadas aos ámbitos saudables e á nutrición, que potencien o envellecemento activo da provincia.
Durante a presentación oficial da asociación, a que foi conducida polo xornalista Carlos Maceiras, tamén interviu a súa vicepresidenta, a farmacéutica e nutricionista Cristina Conde, xunto con José Manuel Lage, fundador do Museo Médico Rural Maceda. Este último abordou o papel vocacional do traballo da figura do médico do rural e a súa relación coa lonxevidade. Mentres que Cristina Conde falou do valor dos produtos de proximidade, protagonistas da nosa dieta, e que ostentan un elevado número de Denominacións de Orixe e Indicacións Xeográficas Protexidas. Así mesmo, enxalzou estes productos artesáns e ecolóxicos, de importante presenza no noso territorio, feito que contribúe a que Ourense se sitúe entre as zonas coa taxa de lonxevidade máis alta, superando incluso á prefectura de Okinawa ou Icaria, paradigmas mundiales da lonxevidade.
Dende ‘Ourensividade’ pretenden comezar a realizar próximamente unha serie de actividades orientadas á divulgación: cursos, conferencias e talleres, así como a publicación de artigos científicos e promoción de productos de proximidade, tanto en liña como con catas presenciais (aceite de oliva, viño, mel…), co obxecto de ir confeccionando recetarios e ‘menús lonxevos’, aínda que con perspectiva interxeneracional, que poidan ser ofrecidos en restaurantes e balnearios, potenciando a relación entre o termalismo e a alimentación saudable.