De esquerda a dereita: Estela Bermello, Mónica Fernández, Zaida Iglesias, María Cabanelas, Manuela Noceda, Ascensión Pérez Sampayo, María José Menor, Mª del Carmen Canal e Marta Rodríguez | FONTE: COE Ourense
Ourense, venres 11 de novembro de 2022.- Un ano máis, a Organización Colexial de Enfermería de Ourense quixo estar presente na cea organizada pola Asociación de Mulleres empresarias de Ourense (AME). A presidenta do COE Ourense, Ascensión Pérez Sampayo, acompañada da vicepresidenta da organización colexial, María José Menor, acudiu a este encontro que reuniu a empresarias asociadas da provincia no marco da celebración da 23ª edición do Salón Internacional de Turismo Gastronómico Xantar.
A presidenta e a vicepresidenta do COE Ourense compartiron mesa coa presidenta de AME, María Cabanelas, ademais de Estela Bermello (Bermello Seguros), Mónica Fernández (Prink Ourense), Zaida Iglesias (administrativa de AME), Manuela Noceda (colaboradora de AME) e María del Carmen Canal (empresaria e fundadora de Aceites Abril) acompañada da súa filla Marta Rodríguez.
A presencia do COE Ourense neste encontro anual vén a demostrar o compromiso da entidade co tecido empresarial ourensán. Pola súa banda, a presidenta de AME Ourense, María Cabanelas, resalta a importancia de reunir ás asociadas para intercambiar opinións, o que considera “algo sempre enriquecedor”, crear sinerxias e medrar xuntas.
As convidadas a esta cea desfrutaron dun serán divertido e cheo de bos momentos no que, previamente á cea, tiveron oportunidade de visitar os distintos stands que acolle a mostra Xantar, a única das catro feiras internacionais de Turismo celebradas en 2022 en España especializada en turismo enogastronómico e que este ano está adicada á promoción da “Gastronomía dos Camiños” aproveitando a celebración do dobre Ano Santo Xacobeo 2021-2022.