Participan neste concurso de traslados un total de 3.328 profesionais pertencentes a 67 categorías de persoal estatutario.
No caso das especialidades de cirurxía ortopédica e traumatoloxía e medicina interna (categoría de persoal facultativo especialista de área), adiantouse a publicación da resolución provisional do concurso de traslados aberto e permanente do ano 2022, ao día 12 de agosto, co obxecto de poder incorporar aos profesionais destas especialidades o antes posible.
No proceso deste ano ofertáronse un total de 7.936 destinos, resultando adxudicatarios/as de praza un total de 897 profesionais. Por titulacións, adxudícanse 211 destinos de persoal licenciado sanitario, 397 de persoal diplomado sanitario, 87 de persoal sanitario de formación profesional e 202 de persoal de xestión e servizos.
A categoría con máis adxudicacións é enfermaría, cun total de 376 destinos adxudicados, seguida de médico/a de familia con 121, persoal de servizos xerais con 76, grupo auxiliar da función administrativa con 61 e técnico/a en coidados auxiliares de enfermaría con 59 , cun total de 57.
Por áreas sanitarias, A Coruña-Cee, Vigo e Santiago-Barbanza son as que incorporarán o maior número de profesionais, cun total de 199, 173 e 154, respectivamente.
Un total de 70 profesionais proceden de fóra de Galicia, dos que 23 corresponden á persoal licenciado sanitario de diferentes especialidades.
Por tramos de idade, un total de 33 profesionais teñen menos de 40 anos, 579 teñen unha idade comprendida entre 40 e 55 anos, e 285 superan esta idade. Do total de persoas adxudicatarias o 78,34 % son mulleres.
As listas coa relación definitiva de persoas admitidas e excluídas por categoría, as puntuacións provisionais desagregadas por epígrafe do baremo e os destinos provisionais, se é o caso, asignados están publicadas, á disposición das persoas interesadas, na páxina web do Servizo Galego de Saúde (www.sergas.es).
Ademais, o estado de cada solicitude pode ser consultado polo concursante no seu expediente electrónico persoal en Fides/expedient-e/sección de procesos.
Os/as concursantes admitidos/as dispoñen dun prazo de quince (15) días hábiles, contados a partir do día seguinte ao da publicación desta resolución no Diario Oficial de Galicia, para formular reclamación contra os resultados da baremación e adxudicación provisionais.
As reclamacións presentadas, entenderanse rexeitadas ou admitidas na resolución da Dirección Xeral de Recursos Humanos do Servizo Galego de Saúde pola que se resolva definitivamente o concurso de traslados.
Habilitouse un enderezo de correo electrónico no que os/as aspirantes poderán dirixir as súas dúbidas ou consultas: Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.. Estas consultas non terán a consideración de reclamación.